Psa 111 | YON | STEP | Yarimanbed ye aningko kankoonime. Ne kuu ne niindem aom kumundin kumbed Yariman yaa eso andaniin, kangdommo doriibdan nedbimaib aombed.

Psalms 111

Yook 111

1 Yarimanbed ye aningko kankoonime.
Ne kuu ne niindem aom kumundin kumbedYariman yaa eso andaniin,
kangdommo doriibdan nedbimaib aombed.
2 Yariman ye ambangkanabi kuu darewoob arimbed,
ye ambangkanabi yaa dowakeniib keriwendan kuu kuyaa andangke meendobimaib.
3 Ye kamenabi kuu nambiriyiib manimanandewiib,
kwane ye yorokmo kerekmen kuu aron korem kwane angkimbaraneen.
4 Binangke ye yaa anam andi yeman ongmenaboon kuu nub yaa daandaane meenimaub, nonondandaubban.
Yariman kuu kabamoon kondoon ye mimyob dowaken keendi ye God,
ye kuu nub yaa dabab menebaane mimyob kowi ye God.
5 Ye yaa unimaibdan yaa kuu yembed animan bangkandimaan,
kwane yembed amob weng ongmoon kuyaa kuu aron korem meenembirimaan.
6 Yembed ye nimakarub yaa ye ambangkanabi yaromkono kuu korokbendoon,
ambibkin yenadan yi okad kuu kande yi yaa kondoon kowe.
7 Ye dingkimbed ambangkanabi kuu anammo, yi kuu yorokmo,
kwane ye kongamki yamob kuu angkumone dobiri yeman.
8 Yi kuu aron korem kwane dangembaraneen,
yi kuu anamiibbed awinimaib, yi kuu yorokmoyiibbed awinimaib.
9 Yembed ye nimakarub biddi ye kiwaan ongmoon,
kwane ye amob weng ongmoon kuu aron korem yeman yedme kowoon.
Ye aningko kuu karadmo, ye aningko kuu binangke ye kuu darewoob arimbed andi yeman.
10 Yariman yaa uneni kuu meeni kangdom ye ambokab,
kwane kane kanembed ye kongamki yamob awinimaib kuu yi korem kuu inamen kaadkeri amun kandiwen.
Ye yaningko kankooni kerekmen kuu aron korem kwane angkimbaraneen.